أبي أتحلطم، أحد عنده مشكله؟

كتبهاأمل المرزوق ، في 10 أكتوبر 2009 الساعة: 17:44 م

أكتب هذي التدوينة باللهجة، من زمان ما دونت باللهجة، صايرة مثقفة آخر عمري وأكتب فصيح! على شنو يا حسرة مادري؟ مو مهم ثقافتي الحين، الموهم اني ابي أتحلطم، والتحلطم مفردة بحرينية يقصد بها إني أعبر عن امتعاضي من شي، ما، أووه عجبتني امتعاضي ! بكثر منها المرات الجاية.

التحلطم لمن لا يعرفه أو يتعرف عليه هو صفة من صفات الشعب البحريني الأصيل، يقدر أي أجنبي يتعرف إذا كان اللي قدامه مواطن أصيل أو مواطن بالتجنيس من خلال التحلطم، الأصيل عنده علامة الحلطمة الأصلية، والثاني تكون عنده بس ميد تايون. واللي ما تكون فيه هالصفة يعتبر دخيل أو مجرد سائح لفترة قصيرة.

بس الحلطمة مو هدفي، أقصد مو الغاية بل الوسيلة لإبداء ما في خاطري، وفي مقولة للمدون الشقيق مستر سنبس "بطلع إللي في جبدي". والجبد في كل الأحوال يمكن تطلع أي شي إلا الحلطمة، لأن التحلطم شي مجهول، لحد الحين العلماء ما اكتشفوا وين مكمنه في الجسم؟

ماعلينا، كنت أتابع مباراة البحرين ونيوزلندا على أرضنا و في استاد البحرين الوطني، تعادلنا فيها بنتيجة صفرية، رغم إن احنا لعبنا أحسن منهم بمراحل، الكورة ما تكاد تفارق أرجل لاعبينه، بس حظهم عوي، لأن الكوره كله تيي عويه وما تدش في المرمى، الموهم إن عورني قلبي على اللي كنت أشوفه، بس أبتدي منين الحكاية؟ مادري والله مادري، كلشي فينا يكسر الخاطر، بدءاً من الاستاد الكحيان، واللي منتهي وحالته حاله، حتى الحشيش!! أضعف الإيمان حشيش نفس الناس، ماميش، بقعة خضرة وبقعة صفره، والكراسي المكسرة مالت الجمهور، كل كرسي يتخلخل على صوب، كن اللي قاعد عليه راكب دورفه مب يالس على كرسي استاد، يالله الحمدلله على كل حال ع الأقل عندنا استاد مو ؟ يقولون في تورابورا مافيه استاد وطني.

انزين والتلفزيون؟ آآه يا قلبي من التلفزيون وعلى التلفزيون، المشكلة إني اشتغلت في تلفزيون البحرين، وأحبه، صج محد يطالعه في بيتنا غيري، بس بعد أحبه، وما أرضى عليه، وأتابع الجديد اللي فيه وأتمنى له التطوير، صج امنتياتي صعبة المنال، لا يا شباب لا تفهموني غلط، مو منال سكرتيرة القسم عندنا في الجريدة، أقصد المنال يعني صعبة التحقيق، بس الواحد يتمنى ع الأقل.

الزبببببببببده .. يلست أطالع المباراه والتصوير حالته حاله، والإضاءة وما أدراك ما الإضاءة؟ شي مأساوي، غير نقاوة الشاشة، نقاوتها بالضبط تشبه الرؤية في عين واحد يتسبح ودش في عيونه شامبو، شي ماله حل بصراحه. والصوووت، قصة أخرى وقضية ثانية، كل شوي يتقطع، كنت أقدر ببساطة أفر على الجزيرة الرياضية وأكمل المباراة، بس عناااااد حق روحي كنت أتابع المباراه في تلفزيون البحرين. أمااااااا الساعه، تعرفون الساعة؟ لا لا مووو ساعة الملعب الخرابه، أقصد الساعة مالت التلفزيون، فوق على الشاشة يحطون الساعه يم عدد الأقوال، يوم قرب يخلص الشوط الأول حطووا الساعه.

شنو ذي ؟ شالقصة؟ شالسالفة؟ معقولة هالكثر احنا دايخين وحالتنا حاله؟ لا ملعب ولا تغطية تلفزيونية سنعه؟ للحين اتذكر حسرتي يوم شفت الاستاد في الدوحة شلون يشرح الصدر. بس شنسوي؟ مالنا إلا ممارسة دورنا التحلطمي بجدارة، على فكرة من كثر ما آنا مستائة من النتيجة والتلفزيون والملعب حتى مالي خلق أنسق الخط ولا أرتبه، وخله معفوس هلون واللي عاجبه عاجبه واللي مب عاجبه كيفه خل يروح يتحلطم مثلي.

أضف الى مفضلتك

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج

الإمبراطور سنبس قال:
أكتوبر 11th, 2009 at 11 أكتوبر 2009 10:22 ص

هههههههههههههههههههههههههههههههههههههههههههههههههههههههههههههه

أمل ..
أفقعتي مرارتي ضحكاً يا امـرأة !

أنتين لو مسـوية مثل خطتي وقايلة للشباب الي يعرفون بالكورة يطرشون لج مسج إذا فزنا ! و بعدين قمتين و جيتين الصالة الثقافية في الجفيـر جان ما فضحتينا و فضحتين الشعب البحريني الأصيل وياج

أذكر قبل أربع سنوات لما خسرنا أمام ترناد توباغو، كنت في مجمع الدانة و أمة لا إله إلا الله أمام التلفزيـونات هناك .. و بعض البنات لما خلصت المباراة قاموا يبجون وا عليا عليهم .. انا كنت اضحك

وفاء قال:
أكتوبر 11th, 2009 at 11 أكتوبر 2009 11:01 م

ههههههههههه
كلامج كله عدل مافي شي صاحي بالملعب ولا التلفزيون
يالله الله كريم اذا اعتدل حال المواطنين الا بلا شغل بيعتدل كلشي بعدين
ثنكيوو على التدوينة ناااايس